Kaveinga Lotu Sānuali – Siune 2024

Sānuali: Ke tau toe kamata fo’ou, `i he Tui mo e Ngāue, ‘o Tali ‘aki ‘a e Ui `a e Tamaí kuo fou mai `i hotau Papitaisó. / Let us begin anew by responding in faith and action, to our Father who has called us through our baptismal.

‘Ahongofua 1: “Ke tau toe kamata fo’ou, `i he Tui mo e Ngāue” ki ha faka-Melino ki he tau ‘oku lolotonga hoko ‘i he vā ‘o Ukraine mo Lūsiá kae’uma’ā ‘a ‘Isileli mo e kau Tautoitoi Hamas (‘Aisea 60: 1-2).

Sāpate ‘o e ‘Epifaní: Ke tau hūfia ‘a e ngāue ‘o e ‘ahó ni mo e Uiké, pea tau tukupā he kamata’anga ‘o e ta’ufo’oú ni, ke “Taki” kitautolu ‘e he “Fetu’u” na’á ne taki mai ‘a e kau Poto mei he Hahaké, ke a’u ki he Valevale Tapú (Matiu 2: 9-10).

‘Ahongofua 2: “Ke tau toe kamata fo’ou, `i he Tui mo e Ngāue” ke “fakaongoongolelei’i ‘a e ‘Otuá ‘i he’etau ngaahi me’a fakasinó” pea tau lotu ‘o kole ki he Laumālie Mā’oni’oní ke ne tokoni’i kitautolu (1 Kolinito 6: 19-20).

Sāpate Hono 2 Hili e ‘Epifaní: Ke tau hūfia ‘a e ngāue ‘o e ‘ahó ni mo e Uiké, pea tau lotu ma’á ‘etau fānau akó pea mo e feinga ‘oku nau faí. Tauange pea mo e ‘Otua ‘oku toka mei ma’anangá ke ne huluhulu mo fakamaama, fakalotolahi’i mo malu’i kinautolu ‘i he ta’u fakaako kuo nau kamatá ni (Saame 139: 1-6).

‘Ahongofua 3: “Ke tau toe kamata fo’ou, `i he Tui mo e Ngāue” ke faingofua ha’atau si’aki ‘a e ngaahi “mafai” mo e “tu’unga” na’a tau fa’a falala aí ka tau unga pe kia Sihova ko hotau hūfanga lau’itānití (Saame 62: 5-8).

Sāpate Hono 3 Hili e ‘Epifaní: Ke tau hūfia ‘a e ngāue ‘o e ‘ahó ni mo e Uiké, pea tau pole “Ke tau toe kamata fo’ou, ‘i he Tui mo e Ngāue, ‘o Tali ‘a e Ui ‘a e Tamaí kuo fou mai ‘i hotau Papitaisó” ke hoko ko ‘ene kau ako (Ma’ake 1: 17-18).

‘Ahongofua 4: “Ke tau toe kamata fo’ou, `i he Tui mo e Ngāue” ke poupou mo fakamanavahake kinautolu si’otau kaungā fononga ‘oku “kamata tuí” (1 Kolinito 8: 9-11).

Sāpate Hono 4 Hili e ‘Epifaní: Ke tau hūfia ‘a e ngāue ‘o e ‘ahó ni mo e Uiké, pea tau hapai ‘i he lotu ‘anautolu kotoa pe ‘oku lolotonga lotomo’ua mo lotohoha’a koe’uhi ko ha faingata’a ‘i he hala fonongá (Ma’ake 1: 25-27).

‘Ahongofua 5: “Ke tau toe kamata fo’ou, `i he Tui mo e Ngāue” pea tau hūfia si’i kau toulekeleka kotoa pē ‘o e Siasí ke fakamonū’ia mai si’i fakatōtōla’ā ‘oku faí (‘Aisea 40: 29-31).

KO E LAU FOLOFOLA FAKA’AHO