Kaveinga Lotu ‘Epeleli – Siune 2024

‘Epeleli: Pea `ilo KO AU ko e `Otua. / And Know that I AM God.

‘Ahongofua 1: Ka taú ka `ilo `a e `Otuá, te tau nonofo melino mo hotau kaungā fonongá. Ke tau hufia `a hotau Siasi (United Methodist Church) ke hā sino `a e melinó `i he katokatoa `o e fa`unga `o e Siasí, ‘o kamata pe mei he Siasi faka-kolo `o a`u ki he Konifelenisi Senialé (Saame 133).

Sāpate 2 ‘o e Toetu’u: Ke tau hūfia ‘a e ngāue ‘o e ‘ahó ni mo e Uiké, pea tau hūfia `a e ngaahi kupu kotoa `o e Siasi Metotisi Fakatahataha faka-māmani lahí (UMC), ke fakatonua `e he Laumālie Mā`oni`oní `a e teuteu kotoa pe `oku fai ki he Konifelenisi Seniale `o fou `i he `etau `ilo `a Sīsū Toetu`u (Sione 20: 19).

‘Ahongofua 2: Ka taú ka `ilo `a e `Otuá, te tau `inasi `i he `ene nongá. Ke tau hūfia `a e fungavaka faka-māmani lahi `o e Siasi Metotisi Fakahataha (global body of The UMC), kau fakafofonga ki he Konifelenisi Senialé, mo e ngaahi kupu kotoa `o e Siasí, `o a`u mai kia koe mo au, ke tau kei fekumi ai pe ki he nonga `a e `Otuá ke tau `inasi ai (Saame 4).

Sāpate 3 ‘o e Toetu’u: Ke tau hūfia ‘a e ngāue ‘o e ‘ahó ni mo e Uiké, tau hūfia `a e `uluaki kakai `o e fonua haú ni `i he Sāpate `oku fakamanatua ai `a e mo`ui mo e ngaue `a e Native Americans, pea tau tulituli ke tuha `etau mo`uí pea mo e fānau `a e `Otua (1 Sione 3: 1-2).

‘Ahongofua 3: Ka taú ka `ilo `a e `Otuá, `e `ikai te tau lau `ofa pe, ka te tau fakasino `a e `ofá `i he ngāue mo e mo`ui. Ke tau hufia `a e ngaahi fai tu`utu`uni `e fakahoko `i he Konifelenisi Seniale ke fatu`aki `a e `ofa MO HONO NGAUE`I (1 Sione 3: 16-18).

Sāpate 4 ‘o e Toetu’u: Ke tau hūfia ‘a e ngāue ‘o e ‘ahó ni mo e Uiké, pea tau hapai `a kinautolu kotoa pe `oku fononga ki Charlotte, North Carolina mei he ngaahi tapa kehekehe `o e kolopé ki hono fakahoko `o e Konifelenisi Seniale `i he `aho ‘aho 23 ki Me 3, ke nau `inasi `i he tauhi haohaoa `a Sihova `o a`u ki ha`anau foki (Saame 23).

‘Ahongofua 4: Ka taú ka `ilo `a e `Otuá, te tau nofo ma`u `iate Ia. Ke tau hufia `a e Konifelenisi Senialé – kau fakafofonga palotí, kau Pisopé mo e fatongia Sea `oku nau fakahokó, pea mo e kau Taki kotoa `o e UMC `oku nau lolotonga `i Charlotte, North Carolina, ke nau kei pipiki ki he Vaine Mo`oniá `i hono fakahoko honau ngaahi fatongia pea tafe mai ai ha faka-`amanaki ki he ngāue mo e kaha`u `o hotau Siasi - UMC (Sione 15: 1-8).

Sapate 5 Hili ‘a e Penitekosi: Ke tau hūfia ‘a e ngāue ‘o e ‘ahó ni mo e Uiké, pea tau kau fakataha mo e kau fakafofonga ki he Konifelenisi Seniale, kau Pisope, mo e kau ma`u fakataha kotoa `i Charlotte, North Carolina, pea pehē ki he kupu kotoa `o e Siasí `i he ngaahi tapa kehekehe `i māmani, `o kei kole ki he Laumālie Mā`oni`oní ke hifo mai ki he Fale Alea `o e Siasí ke fakatonua `a `e ngaahi fai tu`utu`uni kotoa pe (Saame 22: 25-31).

Me: ‘Oku tau tui ki he `Otua ko e Laumālie Mā`oni`oni, ke ne Tataki, Fakanonga, mo Fakaivia kitautolu./We believe in The Holy Spirit, God present with us for guidance, for comfort, and for strength.

‘Ahongofua 1: “‘Oku tau tui ki he `Otua ko e Laumālie Mā`oni`oni, ke ne Tataki, Fakanonga, mo Fakaivia kitautolu.” Ke tau fakafeta`i he ko e ivi ia kuo fakaikuna `ai `a e Konifelenisi Seniale `a e Siasi pea tau kei tautapa ki he ivi ko iá ke ne tokoni`i kitautolu ke tau malava `o ikuna`i `a māmani (1 Sione 5: 4-5).

Sāpate 6 ‘o e Toetu’u: Ke tau hūfia ‘a e ngāue ‘o e ‘ahó ni mo e Uiké, pea tau hūfia `a e hako tupu `o e Siasí mo e kau Failautohi faka-Sāpaté ke fakaivia kinautolu `e he Laumālie Mā`oni`oní ke fakahoko `a e ngaahi malanga `o e `ahó ni, pea fakasino `i he `enau mo`uí `i he `aho kotoa pē (Saame 98).

‘Ahongofua 2: Ke tau kole ki he `Otua ko e Laumālie Mā`oni`oní ke ne Tataki, Fakanonga, mo Fakaivia `a e ngaahi Fa`ē kotoa ke nau kei malava `o fakahoko honau fatongia faka-Otuá `i he Siasí, fāmilí mo e fonuá (Saame 1).

Sāpate Hā’ele Hake: Ke tau hūfia ‘a e ngāue ‘o e ‘ahó ni mo e Uiké, pea tau hūfia `a `etau ngaahi Fa`ē toulekeleka kuo nau toka pe `i honau ngaahi `api nofo`anga `o `ikai ke toe lava mai ki falelotu, ke nau kei `inasi `i he nonga mo e fiemālie `a e `Otuá (1 Sione 5: 9-13).

‘Ahongofua 3: “‘Oku tau tui ki he `Otua ko e Laumālie Mā`oni`oni, ke ne Tataki, Fakanonga, mo Fakaivia kitautolu.” Ke tau tautapa ki he ivi `o e Laumālie Mā`oni`oní ke ne fakanonga `a e si`i fu`u kakai tokolahi kuo uesia `enau mo`ui `i he ta`au kovi `o e ngaahi tau `oku lolotonga hoko `i māmani (Loma 8: 26-27).

Sāpate Penitekosi: Ke tau hūfia ‘a e ngāue ‘o e ‘ahó ni mo e Uiké, pea tau hūfia `a e ngaahi Siasi faka-Kalisitiane kotoa pe `i māmani ke kei tu`ulāhoko `a `enau fakamo`oni `Otua `i he lea mo e ngāue (Saame 104: 30-34, 35b)

‘Ahongofua 4: “‘Oku tau tui ki he `Otua ko e Laumālie Mā`oni`oni, ke ne Tataki, Fakanonga, mo Fakaivia kitautolu,” pea tau malava ai `o hiki mei he mo`ui ‘oku ilifia ki he ngaahi faingata`a `o e fononga`angá, ki he mo`ui `oku tupulaki `iate ia (Loma 8: 12-17).

Sāpate Tolu Taha’i ‘Otua: Ke tau hūfia ‘a e ngāue ‘o e ‘ahó ni mo e Uiké, pea tau hūfia `a e fekumi `oku fai `e he kau mataotaó ke ma`u ha ngaahi faito`o ki he ngaahi fokoutua `oku te’eki ke ma’u hano faito’o pea kuo tokolahi ‘a e ngaahi mo’ui kuo mole ai `o hangē ko e kanisa (Saame 29).

‘Ahongofua 5: Ke tau fakafeta`i ki he `Otua ko e Laumālie Mā`oni`oni, `i he Tataki, Fakanonga, mo e Fakaivia `oku tau ta`imalie ai, pea tau fakamo`oni ko Ia pe ‘a e “Sātai” `oku fe`unga mo hotau vaivaí `i he fononga pilikimi ‘oku tau fai mei taimi ki `itānití (2 Kolinito 4: 7-12).

Siune: ‘Oku fai ‘e he Kelesi ‘a e ‘Otuá, ‘a hotau Liliú / The Grace of God Changes Us.

Sāpate 2 Hili ‘a e Penitekosi: Ke tau hūfia ‘a e ngāue ‘o e ‘ahó ni mo e Uiké, pea tau lotua ‘a e ngaahi Konifelenisi faka-ta`u (Annual Conference) `oku fakahoko `i he mahiná ni, pea tau tautapa ki he Kelesi `a e `Otuá ke ne liliu kitautolu ke tau tuha mo `ene `ofá mo e ui `oku fai ki he `etau mo`uí (1 Samiuela 3: 1-10).

‘Ahongofua 1: Tau fakafeta`i `i he `etau a`usia `a e `uluaki lotu `aho ngofua `o e mahina vaeua `o e ta`ú, `o tau kei fakamo`oni “‘Oku fai ‘e he Kelesi ‘a e ‘Otuá, ‘a hotau Liliú,” pea tau pīkitai ki he Kelesi ko iá ke ne fai hotau fakaa`u `i he ngaahi fatongia kotoa pe `oku tau fakafua `i he mo`ui (2 Kolinito 4: 15-18).

Sāpate 3 Hili ‘a e Penitekosi: Ke tau hūfia ‘a e ngāue ‘o e ‘ahó ni mo e Uiké, pea tau lotua `a `etau fānaú pea mo e faka`osi`osi `o e ta`u fakaako ko `eni ke nau kei `inasi `i he kelesi `a e `Otuá ke fai ai honau liliu pea ma`u ai `a e maama faka`atamai ke fakatupulekina ai `a e mo`ui (Saame 138).

‘Ahongofua 2: Ke tau hūfia `a e ngaahi Tamai `a e Fāmilí, Siasí mo e Fonuá ke kei fai `e he Kelesi `a e `Otuá honau liliú, pea nau kei mo`ui `aki `a honau fatongia faka-`Otua ko e tō mo tauhi `a e pulopula tapu `a e `Otuá, ka ko e fanau kuo foaki kiate kinautolu (Ma`ake 4: 26-29).

Sāpate 4 Hili ‘a e Penitekosi (Sāpate Tāmai): Ke tau hūfia ‘a e ngāue ‘o e ‘ahó ni mo e Uiké, pea tautapa ki he Kelesi liliu mo’ui ‘a ‘etau Tamai Faka-Hēvani ke ne tokoni’i si’etau fānau kuo nau mo’ua he ngaahi faingata’a kehekehe ‘o e mo’uí ni koe’uhi ko ha’anau fehalaaki pe ko e fehalaaki ‘a e mātu`á (Saame 20).

‘Ahongofua 3: Ke tau tautapa ki he `Otuá ke kei a`u mai `a `ene Kelesí `o fai hotau liliú, pea tau ma`u ai `a e `ilo mo e mafai fe`unga ke ikuna`i `aki `a e ngaahi fu`u “Kolaiate” `oku tau fetaulaki mo ia `i he mo`uí ni (1 Samiuela 17: 39-40).

Sapate 5 Hili ‘a e Penitekosi: Ke tau hūfia ‘a e ngāue ‘o e ‘ahó ni mo e Uiké, pea tau lotua `a e si`i kakai tukuhāusia, masiva ange, mo li`ekina `i hotau `ātakaí, pea tau pole ai ke fai ha kihi`i ngāue ke fakasino `aki `a `etau `ofa kiate kinautolú (Saame 9: 9-14).

‘Ahongofua 4: Ke tau hūfia `a e ngaahi fehikitaki `oku fakahoko `i he faka`osinga `o e ta`u faka-Konifelenisi ko `eni, ke `inasi tatau `a e kau Faifekaú mo e ngaahi Tokanga Ngoué `i he kelesi `a e `Otuá ke fakafua `aki `a lakanga fo`ou `oku ui kinautolu ki aí (2 Kolinito 8: 7).

Sapate 6 Hili ‘a e Penitekosi: Ke tau hūfia ‘a e ngāue ‘o e ‘ahó ni mo e Uiké, pea tau tautapa ki he `Otuá ke faka`uha mai `a `ene Kelesí ke tau liliu ai, ke malava `o matu`uhekina `a e ngaahi feliuliuaki `oku tau fetaulaki mo ia `i he hala fonongá (Saame 130: 5-8).

KO E LAU FOLOFOLA FAKA’AHO