NGAAHI KAVEINGA LOTU – SANUALI KI SIUNE 2025

Sanuali: Tuku ke ulo atu ho’o maamá, ko e fakamo’oni ki he ‘iate kitautolu ‘a e ‘Otua ‘o e ‘ofá.

Let your light shine forth as witness that the God of Love is with us.

‘Ahongofua 1: Fakafeta’i he’etau tu’utá, pea tau kau fakataha pē he “fakamo’oni ki he ‘iate kitautolu ‘a e ‘Otua ‘o e ‘ofa,” ‘aki ‘etau “tuku ke ulo atu ‘etau maamá” (‘Aisea 60: 1).

Sāpate ‘o ‘Epifani: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kau fakataha pe mo e kau Maki mei he Hahaké he fakatōmape’e ‘o hū ki he tamasi’i ‘Otuá, foaki mo hotau kotoá, pea tuku ke ne taki kitautolu he ta’ufo’oú ni (Matiu 2: 9-12).

‘Ahongofua 2: Ke tau hūfia ‘a hotau kau Taki faka-Siasí, fāmili, fonuá mo e Pule’angá ke huluhulu, fakamaama mo taki kinautolu ‘e he Laumālie Mā’oni’oní ‘i he ngāue mamafa ‘oku ui kinautolu ki ai ‘i he kamata’anga ‘o e ta’ufo’oú ni (Ngaue 8: 15).

Sāpate ‘o e Papitaiso: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau kau fakataha pe ‘i hono fakaulo atu ‘etau “maamá ko e fakamo’oni ki he ‘iate kitautolu ‘a e ‘Otua ‘o e ‘ofá” ‘i hotau papitaisó (Luke 3: 21-22).

‘Ahongofua 3: Ko ‘etau fakamo’oni ‘oku fai ki he “‘iate kitautolu ‘a e ‘Otua ‘o e ‘ofá,” ‘oku ‘ikai ke fai ‘aki ia hatau poto, ivi pe mafai, ka ‘oku makatu’unga pe ‘i he “māfimafi ‘o e ‘Otuá” (1 Kolinito 12: 4-6).

Sāpate 2 hili ‘a e ‘Epifanī: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau tali ‘i he loto fakafeta’i mo hounga’ia ‘a e “liliu hingoá” pea “Tuku ke ulo atu (‘etau) māmá, ko e fakamo’oni ki he ‘iate kitautolu ‘a e ‘Otua ‘o e ‘ofá” (‘Aisea 62: 4-5).

‘Ahongofua 4: Ke tau hūfia ‘a e kau finemui mo e talavou ‘o e Siasí ke nau tali ‘a e fanafana me’a ‘oku fai ‘e he Laumālié pea nau fakamo’oni ai ki he ‘iate kinautolu ‘a e ‘Otua ‘o e ‘ofá ‘aki hono fakaulo atu ‘enau maamá ki he kaungā fonongá (Saame 19: 8).

Sāpate 3 hili ‘a e ‘Epifanī: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau “fakamo’oni ki he ‘iate kitautolu ‘a e ‘Otua ‘o e ‘ofa” ‘aki ‘etau “’ave ‘a e Ongoongoleleí” mo “fanongonongo ‘a e tukuange ‘o e pōpulá” (Luke 4: 18-19).

‘Ahongofua 5: Ke tau tukupā ‘i he faka’osinga ‘o e ‘uluaki mahiná, te tau lototo’a ‘o fai ta’eteteki ‘etau “fakamo’oni” ki he ‘ofa lahi ‘a e ‘Otuá ‘oku tau toloto monū’ia aí, he ‘oku tau ‘ilo pau ‘okú ne kau mo kitautolu ma’u ai pe (Selemaia 1:7-10).

KO E LAU FOLOFOLA FAKA’AHO