NGAAHI KAVEINGA LOTU – FEPUELI KI SIUNE 2025

Fepueli: Ke tau tali ‘a e Ui ‘a e ‘Otuá pea fakatō’ongamo’ui’i / Let us heed God’s call, putting it into action.

Sāpate 4 hili ‘a e ‘Epifanī: Ke tau hūfia ‘a e ngaahi ngāue ‘o e ‘ahó ní pea mo e uiké, pea tau feinga ‘i he tokoni mai ‘a e Laumālié “Ke tau tali ‘a e Ui ‘a e ‘Otuá pea fakatō’ongamo’ui’i” (1 Kolinito 13: 4-7).

‘Ahongofua 1: Ke tau toe fuakava, ke tau toe tukupā, te tau tali ‘a e Ui ‘a e ‘Otuá ‘oku fai kiate kitautolu fakafo’ituituí, pea neongo ‘a ‘ene faingata’a mo e ‘ikai ha’atau taaú, ka te tau falala kakato ke ne fai hono fakakakatō (‘Aisea 6:5-8).

Sāpate 5 hili ‘a e ‘Epifanī: Ke tau hūfia ‘a e ngaahi ngāue ‘o e ‘ahó ni mo e uiké, pea tau feinga ‘i he tokoni mai ‘a e Laumālié ke talangofua ki he fekau ‘a e ‘Otuá pea fakato’ongamo’ui’i (Luke 5: 3-6).

‘Ahongofua 2: Ke tau tautapa ki he ‘Otua Māfimafí ke ne huluhulu ‘a e hala ‘oku totonu ke tau fou aí, mo e ngaahi fakakaukau ke tau fakalaulauloto aí pea ngaohi mo hotau lotó ke tu’u ma’u pe ‘etau manakó ‘i he’ene Laó (Saame 1).

Sāpate 6 hili ‘a e ‘Epifanī: Ke tau hūfia ‘a e ngaahi ngāue ‘o e ‘ahó ni mo e uiké, pea tau feinga ‘i he tokoni mai ‘a e Laumālié ke tau lava ‘o matatali ‘a e ngaahi faingata’a ‘oku tau fepaki mo ia koe’uhi ko ‘etau mo’ui ‘aki ‘etau tuí (Luke 6: 22-23).

‘Ahongofua 3: Ke tau hufia ‘a e ngaahi ngāue mo e tokoni kotoa pe ‘oku fai ‘e hotau ngaahi Siasí mo hotau kāinga Tongá ‘i he ngaahi fonua muli ‘oku fai ai ‘etau fakapaeá, ke tau kei tu’u kalikali pe mo lotolahi ‘o vēkeveke mo fiefia ke tokoni kiate kinautolu kotoa pē ‘oku nau fiema’u ‘etau tokoní (Senesi 45: 5-8).

Sāpate 7 hili ‘a e ‘Epifanī: Ke tau hūfia ‘a e ngaahi ngāue ‘o e ‘ahó ni mo e uiké, pea tau feinga ‘i he tokoni mai ‘a e Laumālié ke tau lava ‘o ‘ofa’i hotau filí (Luke 6: 27-31)

‘Ahongofua 4: Ke tau fakafeta’i mo tuku kololia he ko e ‘aho ‘o e tué mo e fiefia he kuo tatala ‘e Kalaisi ‘a e veili na’e “fakakehe” ‘aki ‘a e fotufotuaki ‘a e ‘Otua ‘o e ‘Univeesí kia Mōsese mo ‘Isilelí, pea kuo tau mātā ‘a e kolōlia ‘o e ‘Otua ko e Tamaí ‘i hono fakato’ongamo’ui’i ‘e Kalaisí (‘Ekisoto 34: 34-35).

KO E LAU FOLOFOLA FAKA’AHO